ye ġham kā rañg ye āb-e-malāl āñkhoñ meñ

azā kā jaise ho aks-e-hilāl āñkhoñ meñ

kabhī sarāb kabhī tishnagī kabhī sahrā

kabhī kabhī faqat āb-e-zulāl āñkhoñ meñ

nazar milā.ūñ to kaise vo le ke chaltā hai

bahut ajiib se kitne savāl āñkhoñ meñ

ab aa.ina bhī jo dekhūñ to apne chehre par

maiñ paḌhtī rahtī huuñ terā ḳhayāl āñkhoñ meñ

zarā sī der ko 'farhat' nazar nazar se milī

phir us ke ba.ad to jām-e-sifāl āñkhoñ meñ