kuchh sukūñ pā.ūñ jo is sahn-e-makāñ se chhūTūñ

phir nayā ek safar ho maiñ jahāñ se chhūTūñ

saare ehsās se har sūd-o-ziyāñ se chhūTūñ

ho ke ḳhāmosh gunāhān-e-bayāñ se chhūTūñ

tund-ḳhū tāzī-e-be-bāk ḳhirāmāñ kī qasam

kaash raftār-o-ram-o-raḳhsh-e-ravāñ se chhūTūñ

muzmahil ho ke Thaharne nahīñ detī sur.at

kaash āzād ho tausan ki inaañ se chhūTūñ

zikr kuchh dil kā na kuchh baat tamannāoñ kī

ḳhushk āñkheñ hoñ maiñ īzā-e-fuġhāñ se chhūTūñ

raqs ho ātish-e-sayyāl kā aur ḳhaak huuñ maiñ

gardish-e-shām-o-sahar dahar-o-zamāñ se chhūTūñ

tā.er-e-rūh har ik gosha-e-jāñ dekhtā hai

jism se jaan se kis dar se kahāñ se chhūTūñ

chhūTūñ 'farhat' se aziyyat se sukūñ se ġham se

nā-tavānī se sahī tāb-o-tavāñ se chhūTūñ