vo parinda hai kahāñ shab ko chahakne vaalā
rāt-bhar nāfa-e-gul ban ke mahakne vaalā
lukka-e-abr thā bas dekhne aayā thā mujhe
koī bādal to nahīñ thā vo chhalakne vaalā
raakh meñ aañkh meñ phūloñ pe kasīlī shab meñ
be-zarūrat bhī to chamkā hai chamakne vaalā
kis kī āvāz meñ hai TūTte pattoñ kī sadā
kaun is rut meñ hai be-vaj.h sisakne vaalā
chāñd ho roz badalte ho tumhārā kyā hai
maiñ samundar huuñ abad tak na bahakne vaalā
pī liyā lauT gayā ḳhushk huā kuchh to batā
kyā huā aañkh se aañsū vo Tapakne vaalā