milegā is kā mujhe kyā uThā ke laayā huuñ

purāne vaqt kā sikka uThā ke laayā huuñ

tumhārī tishnagī dekhī nahīñ ga.ī mujh se

maiñ apnī ok meñ dariyā uThā ke laayā huuñ

shab-e-siyāh meñ kuchh to mujhe suhūlat ho

kisī kī yaad kā taarā uThā ke laayā huuñ

jo ho sake to zarā muḳhtalif banā ab ke

maiñ qasr-e-zāt kā malba uThā ke laayā huuñ

ye pyaas ilm kī kuchh to bujhā.iye sāhab

baḌe jatan se maiñ basta uThā ke laayā huuñ

havāle dhuup ke jis ne mujhe kiyā ik din

usī ke vāste saaya uThā ke laayā huuñ

tamām ashk sarāboñ meñ Dhal ga.e 'arshad'

shikasta aañkh meñ sahrā uThā ke laayā huuñ