tā-dasht-e-adam āh-e-rasā le ga.ī mujh ko
jab ḳhaak huā maiñ to havā le ga.ī mujh ko
kosoñ mai-e-gulgūñ kī havā le ga.ī mujh ko
ye laal parī ghar se uḌā le ga.ī mujh ko
muddat se na miltī thī kahīñ raah adam kī
us shoḳh ke kūche meñ qazā le ga.ī mujh ko
thā zo.af meñ saudā kisī sahrā-e-junūñ kā
vahshat mire ghar aa ke bulā le ga.ī mujh ko
'jauhar' taraf-e-kūcha-e-jānāñ jo gayā maiñ
kyā jaane kidhar kī ye havā le ga.ī mujh ko