pa.e-gul-gasht sunā hai ki vo aaj aate haiñ
phūloñ kī bhī ye ḳhushī hai ki khile jaate haiñ
bahr-e-taskīn-e-dil ahbāb ye farmāte haiñ
aap kahiye to abhī jā ke bulā laate haiñ
gudgudī kar ke hañsāte haiñ jo ġhash meñ ahbāb
kis ke rūmāl se talve mire sahlāte haiñ
aap ke hote kisī aur ko chāhūñ tauba
kis taraf dhyān hai kyā aap ye farmāte haiñ
merī hī jaan ke dushman haiñ nasīhat vaale
mujh ko samjhāte haiñ un ko nahīñ samjhāte haiñ
bulbulo baaġh meñ ġhāfil na kahīñ ho jaanā
har taraf ghaat meñ sayyād nazar aate haiñ
ḳhuub pahchān liyā ham ne tumheñ dil de kar
sach kahā hai ki jo khote haiñ vahī paate haiñ
mujh ko bāvar nahīñ sach sach ye batā de hamdam
tū ne kis se ye sunā hai ki vo aaj aate haiñ
kyā dil o diida bhī harkāre haiñ sub.hān-allāh
laakh pardoñ meñ koī ho ye ḳhabar laate haiñ
dekh achchhā nahīñ 'jauhar' kahīñ maa.il honā
jab bhī samjhāte the ab bhī tujhe samjhāte haiñ