ik haqīqat huuñ agar iz.hār ho jā.ūñgā maiñ
jaane kis kis jurm kā iqrār ho jā.ūñgā maiñ
kaaT lo ab ke mujhe bhī ḳhvāhishoñ kī fasl par
zindagī ik ḳhvāb hai bedār ho jā.ūñgā maiñ
rafta rafta baaġh kī sab titliyāñ kho jā.eñgī
aur ik din ḳhud se bhī bezār ho jā.ūñgā maiñ
yā to ik din toḌ Dālūñgā hisār-e-āgahī
yā kisī qisse kā ik kirdār ho jā.ūñgā maiñ
aks-andar-aks aatā hai nazar mujh ko 'kamāl'
kyā kisī din aa.ine ke paar ho jā.ūñgā maiñ