dasht-o-sahrā phir se apnā.eñ bhī kyā

vahshatoñ ko apnī samjhā.eñ bhī kyā

dard hī ḳhvāboñ kā ḳhamyāza sahī

duur dasht-e-dard se jaa.eñ bhī kyā

aur kuchh lamhe Dubo deñ chaa.e meñ

yaar is garmī meñ ghar jaa.eñ bhī kyā

ye bahut kuchh to hai gardānā tumheñ

aur is se nīche ab aa.eñ bhī kyā

faisla kar degī ik mauj-e-havā

Dahtī dīvāroñ ko ham Dhā.eñ bhī kyā

shā.irī bāzīgarī to hai nahīñ

sho.abde yāroñ ko dikhlā.eñ bhī kyā