dard siine meñ kahīñ chīḳh rahā ho jaise
terī jānib se koī tiir chalā ho jaise
mere ashkoñ ke samundar meñ koī tāj-mahal
dhīre dhīre se kahīñ Duub rahā ho jaise
umr guzrī magar ehsās yahī rahtā hai
vo abhī uTh ke mire ghar se gayā ho jaise
tere har nashtarī jumle bhī lage haiñ pyāre
tere dushnām kī tāsīr judā ho jaise
sham.a kī lau ne ab sar ko jhukāyā aisā
jalte rahnā bhī mirā merī ḳhatā ho jaise