nigāh o dil meñ vahī karbalā kā manzar thā

maiñ tishna-lab thī mire sāmne samundar thā

bahut ġhurūr thā biphre hue samundar ko

magar jo dekhā mire āñsuoñ se kam-tar thā

hamāre hisse meñ aa.ī hai ret sāhil kī

kisī ne chhīn lī vo siip jis meñ gauhar thā

bahut sukūn thā Thahre hue samundar ko

ki us meñ jo bhī thā tūfān mere andar thā

vo shaḳhs aayā thā ai 'sham.a' le ke mausam-e-gul

use ḳhabar hī na thī dard merā zevar thā