Syeda Nafis Bano shama

har-su KHushbu ko fazaon mein bikharta dekhun

Syeda Nafis Bano shama

Ghazipur, Uttar pradesh, India

1957
har-sū ḳhushbū ko fazāoñ meñ bikhartā dekhūñ
jab kisī shāḳh pe ik phuul ko martā dekhūñ
apnī āñkhoñ meñ nayā ḳhvāb sajā luuñ koī
jab kisī ḳhvāb kī ta.abīr ko martā dekhūñ
apne ham-rāh lahū rotī huī āñkhoñ par
niiñd kā bojh liye shab ko utartā dekhūñ
apnā miTTī kā diyā aur bhī raushan ho jaa.e
jab kabhī chāñd ko āñgan meñ utartā dekhūñ
khiḌkiyāñ khol luuñ har shaam yūñhī sochoñ kī
phir usī raah se yādoñ ko guzartā dekhūñ
'sham.a' mat toḌnā ehsās kā ā.īna agar
guzre vaqtoñ kā koī aks utartā dekhūñ
Top Urdushayar.com