saare chaman ko dasht meñ tabdīl kar ga.e
be-dard the jo ain javānī meñ mar ga.e
malbūs-e-ahl-e-hosh kā me.aar dekh kar
dīvāne be-libās daraḳhtoñ se Dar ga.e
shāyad udāsiyoñ pe taras aa gayā mirī
kal raat shahr-e-jāñ meñ farishte utar ga.e
sunte haiñ un pe nuur barastā hai aaj tak
jin vādiyoñ se ho ke tire ḳhush-nazar ga.e
ham sar-phire bhī ḳhuub the ai 'dil' ki ishq meñ
nāmūs-o-nañg-o-nām bhī qurbān kar ga.e