ramz-āshna-e-fasl-e-bahārañ koī na thā
sab mudda.ī the chāk-garebāñ koī na thā
dīvāne dasht meñ bhī nasīb aazmā chuke
vaañ bhī sukūn-e-qalb kā sāmāñ koī na thā
kyā kyā tire marīz ko the naaz dard par
jab bas meñ chāragar ke bhī darmāñ koī na thā
shāyad ye kā.enāt thī mai-ḳhāna in dinoñ
jab imtiyāz-e-gabr-o-musalmāñ koī na thā
ghabrā ke kis ko raah meñ ai 'dil' pukārte
apne sivā qarīb-e-rag-e-jāñ koī na thā