ek maiñ huuñ aur laakh masā.il ḳhudā gavāh
dast-e-talab hai kāsa-e-sā.il ḳhudā gavāh
āñkheñ khulīñ to aur hī manzar thā rū-ba-rū
ḳhud maiñ thā apnī raah meñ haa.il ḳhudā gavāh
ye kā.enāt raqs meñ hai ik mire liye
pahne hue nujūm kī paa.el ḳhudā gavāh
dil meñ mohabbateñ haiñ to ā.ankhoñ meñ hairateñ
mere faqat yahī haiñ vasā.el ḳhudā gavāh
munsif tirī taraf sahī par ḳhūn-e-be-gunāh
degā tire ḳhilāf dalā.el ḳhudā gavāh
din-rāt ik junūn-e-talāsh-e-ma.āsh hai
ab koī munharif hai na qaa.il ḳhudā gavāh