jānib-e-manzil safar meñ raushnī sī hai abhī
is añdherī raat meñ bhī chāñdnī sī hai abhī
jo hamāre dil meñ hai vo buujh leñge ḳhud kabhī
baat kyā samjhā.iye jo an-kahī sī hai abhī
hai vahī dhaḌkan purānī par mirī sāñsoñ meñ kyuuñ
ik na.ī ḳhushbū hai maano tāzgī sī hai abhī
kyā vahī aa.egī le kar chilchilātī dopahar
ik suhānī dhuup jo lagtī bhalī sī hai abhī
ho sake dohrā.iye na baat jo sachchī lage
dushmanī ban jā.egī jo dostī sī hai abhī