jaane is meñ ġham yā ḳhushī hai pahlī baar mohabbat kī hai
apne liye to baat na.ī hai pahlī baar mohabbat kī hai
kise batā.eñ kis se pūchheñ kyuuñ ye taḌap har dam rahtī hai
kaise kaheñ ye ḳhush-ḳhabarī hai pahlī baar mohabbat kī hai
be-sudh sā rahtā huuñ maiñ kyuuñ bhuul gayā apnoñ ġhairoñ ko
ik bas un kī yaad bachī hai pahlī baar mohabbat kī hai
milne par bhī pābandī hai log kaheñ ye ḳhud-ġharzī hai
is meñ hamārī kyā ġhalatī hai pahlī baar mohabbat kī hai
sun rakkhā hai be-shak ham ne log nahīñ deñge ab jiine
duniyā kar le jo kartī hai pahlī baar mohabbat kī hai