dard kī lahar yaqīnan mire ghar jā.egī
maiñ na hūñgā to ḳhudā jaane kidhar jā.egī
mauja-e-ḳhūñ se guzarnā hai guzar jā.egī
chār-din ba.ad ye naddī bhī utar jā.egī
kaun kar saktā hai afkār-o-nazar ko mahsūr
kaam ḳhushbū kā bikharnā hai bikhar jā.egī
manzil-e-zīst tujhe maiñ na karūñgā māyūs
maiñ na pahuñchā to mirī gard-e-safar jā.egī
maiñ añdheroñ ke tasalsul se nahīñ huuñ ḳhā.if
raushnī aaj nahīñ kal mire ghar jā.egī
maiñ to mar saktā huuñ hālāt ke sannāToñ meñ
dosto kyā mirī āvāz bhī mar jā.egī