apnā vajūd maiñ ne ab is tarah paak kar liyā
jal kar tamām ishq meñ ḳhud ko hī ḳhaak kar liyā
us ke liye to khel thā shoḳhī thī yā mazāq thā
maiñ ne hī sab mo.āmla andoh-nāk kar liyā
ab ke junūñ meñ sāneha aisā bhī ho gayā ki bas
dāman to ḳhair chhoḌiye siina hī chaak kar liyā
us se na rābta rahe us kī ḳhushī isī meñ thī
us kī ḳhushī ke vāste ḳhud ko halāk kar liyā
ḳhvāboñ se vo nikal ke ab āñkhoñ meñ jāgne lagā
maiñ ne shadīd ishq meñ vo inhimāk kar liyā
aisā thā dil kā sāneha vo sañg-dil bhī ro paḌā
'ḳhālid' ne jab zarā se ġham kā ishtirāk kar liyā