bichhaḌ ke mujh se ye mashġhala iḳhtiyār karnā
havā se Darnā bujhe charāġhoñ se pyaar karnā
khulī zamīnoñ meñ jab bhī sarsoñ ke phuul mahkeñ
tum aisī rut meñ sadā mirā intizār karnā
jo log chāheñ to phir tumheñ yaad bhī na aa.eñ
kabhī kabhī tum mujhe bhī un meñ shumār karnā
kisī ko ilzām-e-bevafā.ī kabhī na denā
mirī tarah apne aap ko sogvār karnā
tamām va.ade kahāñ talak yaad rakh sakoge
jo bhuul jaa.eñ vo ahd bhī ustuvār karnā
ye kis kī āñkhoñ ne bādaloñ ko sikhā diyā hai
ki sīna-e-sañg se ravāñ ābshār karnā
maiñ zindagī se na khul sakā is liye bhī 'mohsin'
ki bahte paanī pe kab talak e'tibār karnā