ye kah ga.e haiñ musāfir luTe gharoñ vaale
Dareñ havā se parinde khule paroñ vaale
ye mere dil kī havas dasht-e-be-karāñ jaisī
vo terī aañkh ke tevar samundaroñ vaale
havā ke haath meñ kaase haiñ zard pattoñ ke
kahāñ ga.e vo saḳhī sabz chādaroñ vaale
kahāñ mileñge vo agle dinoñ ke shahzāde
pahan ke tan pe libāde gadāgaroñ vaale
pahāḌiyoñ meñ ghire ye bujhe bujhe raste
kabhī idhar se guzarte the lashkaroñ vaale
unhī pe ho kabhī nāzil azaab aag ajal
vahī nagar kabhī Thahreñ payambaroñ vaale
tire supurd karūñ ā.īne muqaddar ke
idhar to aa mire ḳhush-rañg pattharoñ vaale
kisī ko dekh ke chup chup se kyuuñ hue 'mohsin'
kahāñ ga.e vo irāde suḳhan-varoñ vaale