aas ke rañgīñ patthar kab tak ġhāroñ meñ luḌhkāoge
shaam Dhale in kohsāroñ meñ apnā khoj na pāoge
jāne-pahchāne se chehre apnī samt bulā.eñge
qadam qadam par lekin apne saa.e se Takrāoge
har Tiile kī oT se lākhoñ vahshī āñkheñ chamkeñgī
maazī kī har pagDanDī par nezoñ meñ ghir jāoge
phunkāroñ kā zahr tumhāre gītoñ par jam jā.egā
kab tak apne hoñT mirī jaañ sāñpoñ se dasvāoge
chīḳheñgī bad-mast havā.eñ ūñche ūñche peḌoñ meñ
ruuTh ke jaane vaale patto kab tak vāpas aaoge
jādū-nagrī hai ye pyāre āvāzoñ par dhyān na do
pīchhe muḌ kar dekh liyā to patthar ke ho jāoge