har nafas ik mustaqil fariyād hai
kitnī pur-ġham ishq kī rūdād hai
ghaT rahī haiñ mere dil kī quvvateñ
ab ye shāyad āḳhirī fariyād hai
ho ga.ī shāyad ki ab takmīl-e-ishq
varna kyuuñ shor-e-mubārakbād hai
jism pāband-e-ta.ayyun ho to ho
ruuh to har qaid se āzād hai
phir kahāñ gulshan meñ vo āsūdgī
āshiyāñ jab vaqf-e-barq-o-bād hai
dekhiye anjām-e-kār-kā.enāt
dil mirā phir mā.il-e-fariyād hai
jis meñ 'sāqib' thā vo mujh se ham-kanār
mujh ko vo manzar abhī tak yaad hai