is ġham-kade se kuchh na lagā haath hamāre

āh-e-dil-e-sozāñ hī chalī saath hamāre

dard-o-ġham-o-andoh-o-alam nāla-e-jāñ-kāh

haiñ dushman-e-jānī sabhī yak zaat hamāre

jis ghaat se dil tū ne liyā yaar hamārā

afsos ki haath aa.ī na vo ghaat hamāre

ḳhatra na karo aao milo shauq se pyāre

jo samjhe ho dil meñ nahīñ vo baat hamāre

kyā ham ne bigāḌā falak-e-sifla kā 'joshish'

kyuuñ darpai-e-īzā hai ye din raat hamāre