muskurāne se mudda.ā kyā hai
kah rahe haiñ tumheñ huā kyā hai
pairahan adl kā pahan aa.ī
kaun mazlūm hai jafā kyā hai
shikve ke naam se hī barham haiñ
ye nahīñ pūchhte gilā kyā hai
Daal dī jis ke hausle ne sipar
vo tunak-ārzū jiyā kyā hai
ḳhidmat-e-bandagān-e-haq ke sivā
is ḳharābe meñ kīmiyā kyā hai
sādgī meñ hazār purkārī
bāñkpan meñ chhupā huā kyā hai
izzat-e-nafs rakh sako mahfūz
aur is ke sivā duā kyā hai
saaf do-pāT āsmān-o-zamīñ
daana ġhāfil hai āsiyā kyā hai