zindagī ne jhele haiñ sab azaab duniyā ke
bas rahe haiñ ā.ankhoñ meñ phir bhī ḳhvāb duniyā ke
dil bujhe to tārīkī duur phir nahīñ hotī
laakh sar pe aa pahuñcheñ āftāb duniyā ke
dasht-e-be-niyāzī hai aur maiñ huuñ ab logo
is jagah nahīñ aate bāryāb duniyā ke
zindagī se guzrā huuñ kitnā be-niyāzāna
saath saath chalte the inqalāb duniyā ke
ham ne dast-e-duniyā par phir bhī kī nahīñ bai.at
jānte the ham tevar haiñ ḳharāb duniyā ke