kār-e-ḳhulūs-e-yār kā mujh ko yaqīn aa gayā
itnā shadīd vaar thā mujh ko yaqīn aa gayā
bas yūñhī kuchh gumāñ sā thā koī pas-e-suḳhan bhī hai
dar jo lab-kushā huā mujh ko yaqīn aa gayā
phir vo havā kā qahqaha kaan meñ gūñjne lagā
aur bhī ik diyā bujhā mujh ko yaqīn aa gayā
dā.era-vār thā safar ishq-e-junūñ-sifāt kā
hijr-o-visāl kuchh na thā mujh ko yaqīn aa gayā
ab mirā dard bujh gayā ab mirā zaḳhm bhar chalā
phir vahī dost aa.egā mujh ko yaqīn aa gayā