itne tanhā haiñ ki ab phirte haiñ ham dhūpoñ meñ
saath saayā ho to kuchh baat kareñ rastoñ meñ
ai bahār is ko na de sāya-e-gul meñ āvāz
hai havā-e-chamanī uḌte hue pattoñ meñ
tū dikhānī nahīñ detā to shikāyat kaisī
terī āvāz to aatī hai mirī sāñsoñ meñ
merā chehra kisī ujḌe hue ghar kī sūrat
aur dhuāñ bujhte charāġhoñ kā mirī āñkhoñ meñ
aa dikhā.ūñ tujhe maiñ apnā gulistāñ pyāre
kis qadar phūloñ ke chehre haiñ mire zaḳhmoñ meñ
kyuuñ miTā dī hai banā kar mirī hiire kī lakīr
sañg Dhonā hī jo likkhā thā mire hāthoñ meñ
ai peshawar maiñ musāfir to nahīñ huuñ lekin
sar jhukā.e hue phirtā huuñ tirī galiyoñ meñ
kab tirī aañkh meñ thī karb kī ye lo 'hashamī'
thī kahāñ choT kī āvāz tirī bātoñ meñ