ghar se bāhar kabhī niklā kiije
'hashamī' galiyoñ meñ Tahlā kiije
husn bātoñ meñ bhī paidā kiije
sāmne aa.ina rakkhā kiije
kyuuñ kisī aur ko rusvā kiije
ab ke apnā hī tamāshā kiije
pahle ḳhud aap ko parkhā kiije
aur phir shikva-e-duniyā kiije
kahīñ suulī na samjhe le koī
apnī bāñhoñ ko na kholā kiije
sochiye phuul khilā hai kyā kyā
sūrat-e-sañg na dekhā kiije
itnī fursat bhī kise hai lekin
gāhe-gāhe hameñ pūchhā kiije
har koī muñh meñ zabāñ rakhtā hai
roktā kaun hai bolā kiije
ye bhī andāz hai ik chhupne kā
is qadar paas na aayā kiije
aane lagtī hai shikastoñ kī sadā
aise ḳhāmosh na baiThā kiije
rabt bhī rakhtā hai ma.anī apne
baat be-bāt na Tokā kiije
'hashamī' ġham ne phir añgḌā.ī lī
'hashamī' phir ġhazal inshā kiije