ye zindagī jo guzartī hai imtihāñ kī tarah

hameñ aziiz hai us yār-e-mehrbāñ kī tarah

maiñ us ko bhūlnā chāhūñ to bhuul jā.ūñ magar

vo mere saath hī rahtā hai merī jaañ kī tarah

sajānā chaah rahe haiñ magar sajā.eñ kyā

hamārā shahr hai lauTī huī dukāñ kī tarah

zarā samajh to sahī ahd-e-nā-sipās hameñ

ki tere saath haiñ ham yād-e-raftagāñ kī tarah

ḳhudā-gavāh ki is ahd meñ bhī jiitā huuñ

jo ki sabāt hai paimān-e-dostāñ kī tarah