is ek Dar meñ ki āḳhir ko TuuT jā.egā
ye aa.ina mire hāthoñ se chhūT jā.egā
maiñ toḌ saktā huuñ pal meñ sukūt-e-sañg-nasab
magar ye dhyān ki ik shaḳhs ruuTh jā.egā
zarūr bujh ke rahegā ruḳh-e-safar-talabī
ye aabla hai to ik roz phuuT jā.egā
yaqīn thā ki koī sāneha guzarnā hai
gumāñ na thā ki tirā saath chhūT jā.egā
ham ek ahd-e-abad-yāb kā kharā sach haiñ
hamāre saath hamārā ye jhuuT jā.egā