tanhā.ī meñ aaj un se mulāqāt huī hai
jis baat kī ḳhvāhish thī vahī baat huī hai
āñkhoñ se gire ashk TapāTap to vo bole
bādal ke baġhair aaj ye barsāt huī hai
samjhā huuñ usī din hī se maiñ ziist kā mafhūm
jis din se mirī tum se mulāqāt huī hai
ḳhvāboñ meñ mulāqāteñ to hotī rahīñ aksar
bā-nafs-e-nafīs aaj mulāqāt huī hai
maqsad thā mile ġham se najāt is liye ai 'charḳh'
ik umr mirī vaqf-e-ḳhirājāt huī hai