jab sar-e-bām vo ḳhurshīd-jamāl aatā hai

zarre zarre pe qayāmat kā jalāl aatā hai

phuul muskāte haiñ lahrātī hai Tahnī Tahnī

fasl-e-gul aate hī har shai pe jamāl aatā hai

vo janam-din pe bulāte haiñ hamesha mujh ko

har nayā saal ba-andāz-e-visāl aatā hai

kyuuñ tire hoñT mujhe dete haiñ manfī meñ javāb

mere hoñToñ pe ye rah rah ke savāl aatā hai

jab savālī koī aa jaatā hai dar par to mujhe

us kī baḳhshī huī ne.amat kā ḳhayāl aatā hai

un ke khilte hue joban ko vo murjhā na sakā

aane ko daur-e-ḳhizāñ sāl-ba-sāl aatā hai

mujhe jachtī hī nahīñ aur kisī kī sūrat

jab ḳhayāl aatā hai terā hī ḳhayāl aatā hai

taare ginvātī haiñ phir hijr kī kaalī rāteñ

jab mujhe yaad koī zohra-jamāl aatā hai

yuuñ ruḳh-e-zard chamak uThtā hai aane pe tire

jaise holī meñ koī mal ke gulāl aatā hai

apne hāthoñ ke pale log jo ho jaa.eñ ḳhilāf

un ke aḳhlāq pe ai 'charḳh' malāl aatā hai