dariyā thā saath phir bhī ajab bebasī rahī
sairāb ham hue to magar tishnagī rahī
ahl-e-safar ko justujū manzil pe le ga.ī
gard-e-safar hamārī ye āvārgī rahī
jhukte haiñ ham ġharaz ke liye rab ke sāmne
be-laus ab kisī kī kahāñ bandagī rahī
dīvār kyā khaḌī huī āñgan ke darmiyāñ
chhat se utartī dhuup bhī sahmī huī rahī
āñkhoñ meñ aa ke merī jo ik ḳhvāb bas gayā
phir is ke baad zindagī be-ḳhvāb sī rahī
'resham' ulajh ke rishtoñ ke is pech-o-ḳham meñ ḳhud
apnī hī zaat kā maiñ sirā DhūñDhtī rahī