yuuñ to ik umr saath saath huī
jism kī ruuh se na baat huī
kyuuñ ḳhayāloñ meñ roz aate haiñ
ik mulāqāt jin ke saath huī
kitnā sochā thā dil lagā.eñge
sochte sochte hayāt huī
laakh tākīd husn kartā rahā
ishq se ḳhaak ehtiyāt huī
ik faqat vasl kā na vaqt huā
dil huā roz roz raat huī
kyā batā.eñ bisāt zarre kī
zarre zarre se kā.enāt huī
shāyad aa.ī hai rut chunāv kī
kal jo kūche meñ vārdāt huī
kyā thī mushkil visāl-e-haq meñ 'sadā'
tujh se bas rad na terī zaat huī