koī kashtī meñ tanhā jā rahā hai
kisī ke saath dariyā jā rahā hai
ye bastī bhī na kyā raas aa.ī us ko
uThā kar kyuuñ vo ḳhema jā rahā hai
kahīñ ik buuñd bhī barsā na paanī
kahīñ bādal barastā jā rahā hai
diye ek ek kar ke bujh rahe haiñ
añdherā hai ki baḌhtā jā rahā hai
pahāḌ uupar to nīche khā.iyāñ haiñ
jahāñ se ho ke rasta jā rahā hai
vo vāpas le rahā hai qarz apnā
hamāre paas se kyā jā rahā hai