dil-e-fasurda ko ab tāqat-e-qarār nahīñ
nigāh-e-shauq ko ab tāb-e-intizār nahīñ
nahīñ nahīñ mujhe bardāsht ab nahīñ kī nahīñ
ḳhudā ke vāste kahnā na ab kī baar nahīñ
hamesha va.ade kiye ab ke mil hī jā aa kar
hayāt-o-va.ada-o-duniyā kā e.atibār nahīñ
dikhātī apnī mohabbat ko chiir kar siina
magar numūd mirā sheva-o-shi.ār nahīñ
mirī bahan mirī mahbūba ye ajab shai hai
jahāñ meñ ḳhaak nahīñ kuchh jo dost-vār nahīñ