un ke jaane se ye dil meñ huī sūrat paidā
ki huā dard aur us meñ huī shiddat paidā
is vafā par ye jafā.eñ tirī samjhe samjhe
ki mohabbat hī se hotī hai adāvat paidā
nargis-e-shoḳh meñ tarkīb-e-hayā hai pinhāñ
nigah-e-sharm se hai rañg-e-sharārat paidā
ham jo dil-soz na hote to ye hasrat aatī
ki tire dil meñ bhī ho soz-e-mohabbat paidā
kūcha-e-yār meñ jaanā hī ġhazab thā 'raunaq'
ki huī zumra-e-a.adā meñ qayāmat paidā