jumbish-e-kākul-e-mahbūb se din Dhaltā hai

haa.e kis ḳhūbi-e-uslūb se din Dhaltā hai

pheñk kulfat-zada sūraj pe bhī chhīñTe us ke

jis mai-e-dilkash-o-marġhūb se din Dhaltā hai

koshish-e-banda-e-dānā nahīñ kāmil hotī

sohbat-e-banda-e-majzūb se din Dhaltā hai

mehr ke valvala-e-rāst se pau phaTtī hai

mehr ke jazba-e-maqlūb se din Dhaltā hai

sāqiyā ek 'adam' ko bhī phurerī us kī

jis khanakte hue mashrūb se din Dhaltā hai