afsāna chāhte the vo afsāna ban gayā
maiñ husn-e-ittifāq se dīvāna ban gayā
vo ik nigāh dekh ke ḳhud bhī haiñ sharmsār
nā-āgahī meñ yūñhī ik afsāna ban gayā
mauj-e-havā se zulf jo lahrā ga.ī tirī
merā shu.ūr laġhzish-e-mastāna ban gayā
husn ek iḳhtiyār-e-mukammal hai aap ne
dīvāna kar diyā jise dīvāna ban gayā
zikr us kā guftugū meñ jo shāmil huā 'adam'
jo sher kah diyā vo parī-ḳhāna ban gayā