vo jo tere faqīr hote haiñ
aadmī be-nazīr hote haiñ
dekhne vaalā ik nahīñ miltā
aañkh vaale kasīr hote haiñ
jin ko daulat haqīr lagtī hai
uff! vo kitne amiir hote haiñ
jin ko qudrat ne husn baḳhshā ho
qudratan kuchh sharīr hote haiñ
zindagī ke hasīn tarkash meñ
kitne be-rahm tiir hote haiñ
vo parinde jo aañkh rakhte haiñ
sab se pahle asiir hote haiñ
phuul dāman meñ chand rakh liije
rāste meñ faqīr hote haiñ
hai ḳhushī bhī ajiib shai lekin
ġham baḌe dil-pazīr hote haiñ
ai 'adam' ehtiyāt logoñ se
log munkir-nakīr hote haiñ