farār pā na sakā koī rāsta mujh se

hazār baar mirā sāmnā huā mujh se

daraḳht haath hilāte the rahnumā.ī ko

musāfiroñ ne to kuchh bhī nahīñ kahā mujh se

ye be-hunar bhī nahīñ saath bhī nahīñ dete

na jaane hai mire hāthoñ ko bair kyā mujh se

maiñ lauTne ke tasavvur se ḳhauf khātā huuñ

lipaT na jaa.eñ kahīñ mere naqsh-e-pā mujh se

hazār baar janam bhī liyā to kyā 'ash.har'

mirā vajūd bichhaḌtā chalā gayā mujh se