khet aise sairāb nahīñ hote bhaa.ī
ashkoñ ke sailāb nahīñ hote bhaa.ī
ham jaisoñ kī niiñd thakāvaT hotī hai
ham jaisoñ ke ḳhvāb nahīñ hote bhaa.ī
zinda log hī Duub sakeñge āñkhoñ meñ
mare hue ġharqāb nahīñ hote bhaa.ī
ab sūraj kī saarī duniyā dushman hai
ab chehre mahtāb nahīñ hote bhaa.ī
in jhīloñ meñ pariyāñ roz utartī haiñ
āñkhoñ meñ tālāb nahīñ hote bhaa.ī
socheñ haiñ jo dauḌ dauḌ ke thaktī haiñ
thake hue a.asāb nahīñ hote bhaa.ī