vaqt-e-ruḳhsat aa gayā dil phir bhī ghabrāyā nahīñ
us ko ham kyā kho.eñge jis ko kabhī paayā nahīñ
zindagī jitnī bhī hai ab mustaqil sahrā meñ hai
aur is sahrā meñ terā duur tak saayā nahīñ
merī qismat meñ faqat durd-e-tah-e-sāġhar hī hai
avval-e-shab jaam merī samt vo laayā nahīñ
terī āñkhoñ kā bhī kuchh halkā gulābī rañg thā
zehn ne mere bhī ab ke dil ko samjhāyā nahīñ
kaan bhī ḳhālī haiñ mere aur donoñ haath bhī
ab ke fasl-e-gul ne mujh ko phuul pahnāyā nahīñ