chārasāzoñ kī aziyyat nahīñ dekhī jaatī
tere bīmār kī hālat nahīñ dekhī jaatī
dene vaale kī mashiyyat pe hai sab kuchh mauqūf
māñgne vaale kī hājat nahīñ dekhī jaatī
din bahal jaatā hai lekin tire dīvānoñ kī
shaam hotī hai to vahshat nahīñ dekhī jaatī
tamkanat se tujhe ruḳhsat to kiyā hai lekin
ham se in āñkhoñ kī hasrat nahīñ dekhī jaatī
kaun utrā hai ye āfāq kī pahnā.ī meñ
ā.ina-ḳhāne kī hairat nahīñ dekhī jaatī