dhuup saat rañgoñ meñ phailtī hai āñkhoñ par
barf jab pighaltī hai us kī narm palkoñ par
phir bahār ke sāthī aa ga.e Thikānoñ par
surḳh surḳh ghar nikle sabz sabz shāḳhoñ par
jism o jaañ se utregī gard pichhle mausam kī
dho rahī haiñ sab chiḌiyāñ apne pañkh chashmoñ par
saarī raat sote meñ muskurā rahā thā vo
jaise koī sapnā sā kāñptā thā hoñToñ par
titliyāñ pakaḌne meñ duur tak nikal jaanā
kitnā achchhā lagtā hai phuul jaise bachchoñ par
lahr lahr kirnoñ ko chheḌ kar guzartī hai
chāñdnī utartī hai jab sharīr jharnoñ par