ik hunar thā kamāl thā kyā thā
mujh meñ terā jamāl thā kyā thā
tere jaane pe ab ke kuchh na kahā
dil meñ Dar thā malāl thā kyā thā
barq ne mujh ko kar diyā raushan
terā aks-e-jalāl thā kyā thā
ham tak aayā tū bahr-e-lutf-o-karam
terā vaqt-e-zavāl thā kyā thā
jis ne tah se mujhe uchhāl diyā
Dūbne kā ḳhayāl thā kyā thā
jis pe dil saare ahd bhuul gayā
bhūlne kā savāl thā kyā thā
titliyāñ the ham aur qazā ke paas
surḳh phūloñ kā jaal thā kyā thā