silsila mere safar kā kabhī TuuTā hī nahīñ

maiñ kisī moḌ pe dam lene ko Thahrā hī nahīñ

ḳhushk hoñToñ ke tasavvur se larazne vaalo

tum ne taptā huā sahrā kabhī dekhā hī nahīñ

ab to har baat pe hañsne kī tarah hañstā huuñ

aisā lagtā hai mirā dil kabhī TuuTā hī nahīñ

maiñ vo sahrā jise paanī kī havas le Duubī

tū vo bādal jo kabhī TuuT ke barsā hī nahīñ

aisī vīrānī thī dar pe ki sabhī kaañp ga.e

aur kisī ne pas-e-dīvār to dekhā hī nahīñ

mujh se miltī hī nahīñ hai kabhī milne kī tarah

zindagī se mirā jaise koī rishta hī nahīñ