vasl kā aish kahāñ par ġham-e-hijrāñ to hai
lab-e-ḳhandāñ to nahīñ dīda-e-giryāñ to hai
aarzū aur to kuchh ham ko nahīñ duniyā meñ
haañ magar ek tire milne kā armāñ to hai
haal kyā pūchhe hai hairat-kada-e-dahr kā dekh
aa.ina yaañ kā har ik dīda-e-hairāñ to hai
daam se ḳhat ke chhuTā dil to nahīñ ḳhātir jam.a
qaid karne ko abhī zulf-e-pareshāñ to hai
le chalā dil ko jo vo shoḳh tū hamdam na bulā
aaphī āvegā vo ham paas abhī jaañ to hai
go na ho aish kā asbāb mayassar to na ho
vāste dil ke ġham-o-dard kā sāmāñ to hai
ek hī dam meñ kiyā sar ko judā ḳhuub kiyā
teġh kā terī ye sar par mire ehsāñ to hai
go hue jaib ke TukḌe to nahīñ ġham ham ko
chaak karne ko hamārā abhī dāmāñ to hai
jo paḌe ishq kī aafat meñ vahī jaane 'hasan'
ḳhalq ke kahne meñ yuuñ āshiqī āsāñ to hai