aaj dil be-qarār hai kyā hai
dard hai intizār hai kyā hai
jis se jaltā hai dil jigar vo aah
sho.ala hai yā sharār hai kyā hai
ye jo khaTke hai dil meñ kāñTā sā
mizha hai nok-e-ḳhār hai kyā hai
chashm-e-bad-dūr terī āñkhoñ meñ
nashsha hai yā ḳhumār hai kyā hai
mere hī naam se ḳhudā jaane
nañg hai us ko aar hai kyā hai
jis ne maarā hai daam dil pe mire
ḳhat hai yā zulf-e-yār hai kyā hai
kyuuñ garebān terā aaj 'hasan'
is tarah tār-tār hai kyā hai