dhuāñ uḌāte hue din ko raat karte hue
malañg aag se tathīr-e-zāt karte hue
kahā to thā ye amānat sambhāl kar rakhnā
hamārī nazr vo kul kā.enāt karte hue
maiñ ek jañg ḳhud apne ḳhilāf laḌtā huā
tamām azv-e-badan mujh se ghaat karte hue
ki ham bane hī na the ek dūsre ke liye
ab is yaqīn ko jiinā hayāt karte hue
har ek qaid se āzād bandishoñ se pare
hasīn log hasīñ vārdāt karte hue
agarche kaam thā mushkil magar maza aayā
kashīd zahr se āb-e-hayāt karte hue